პოლიტიკა

თბილისის სახელმწიფო სამედიცინო უნივერსიტეტი (თსსუ) სრულად იზიარებს ხედვას უნივერსიტეტის დანიშნულების შესახებ საზოგადოების კულტურული, სოციალური და ეკონომიკური მომავლის განსაზღვრაში და მის როლს საზოგადოების ჯანმრთელობის უზრუნველყოფაში. ეს კი ნიშნავს, რომ თსსუ-ში სწავლება, კვლევა და სამედიცინო/ფარმაცევტული საქმიანობა ურთიერთისგან განუყოფელია. წინააღმდეგ შემთხვევაში აკადემიური პროცესი ჩამორჩებოდა საზოგადოების სწრაფად  პროგრესირებად მოთხოვნებს და სამეცნიერო ცოდნას, რაც, თავისთავად, რეგრესს გამოიწვევდა. ამავე დროს, კვლევისა და სწავლების თავისუფლება საუნივერსიტეტო ცხოვრების ფუნდამენტური პრინციპი და ერთ-ერთი ძირითადი აკადემიური ღირებულებაა.

კონცეფცია "სწავლა მთელი სიცოცხლის განმავლობაში" (Life Long Learning - LLL) ევროპის ეკონომიკური და სოციალური განვითარების სტრატეგიის მთავარი ელემენტია. რეალურად, ეს ნიშნავს განათლების მიღების შანსს მთელი ცხოვრების მანძილზე ცოდნის, უნარ-ჩვევებისა და კომპეტენციების სრულყოფის მიზნით, პიროვნული, სამოქალაქო და სოციალური განვითარების ინტერესების გათვალისწინებით, დასაქმებითა და ანაზღაურების მიღების პერსპექტივით (!).

თსსუ-ის ხარისხის უზრუნველყოფის სამსახური სტრუქტურული და ფუნქციური რგოლია ადმინისტრაციულ იერარქიაში, რომელიც ხარისხის პოლიტიკის ზემოაღნიშნულ პრინციპებს ახორციელებს. იმდენად, რამდენადაც თსსუ-ში, ასე ვთქვათ, შიდადარგობრივი `აკადემიური სეგმენტი' და ძირითადი ორგანიზაციული ერთეული არის ფაკულტეტი, სწორედ ფაკულტეტის ხარისხის უზრუნველყოფის სამსახურს ძალუძს ხარისხის პოლიტიკის შეფასებისა და განსაზღვრისათვის საჭირო მონაცემთა ბაზის შექმნა და ინფორმაციის პირველადი დამუშავება. საუნივერსიტეტო სამსახური, ფლობს რა ხარისხის შიდა და გარე პროცედურების ინტეგრირების კომპეტენციას და რესურსს, შეიმუშავებს რეკომენდაციებს, შეფასების რეალურ ინდიკატორებს და კრიტერიუმებს თსსუ-ში სწავლების და კვლევის რელევანტურობის უზრუნველყოფისთვის.

ეს მოდელი ყველაზე მეტად შეესაბამება უნივერსიტეტში ხარისხის უწყვეტი განვითარების კონტექსტს: ციკლის ერთი ბრუნის დასრულება მეორეს, ახლის დაწყებას ნიშნავს და ა.შ.

ხარისხის უზრუნველყოფის სამსახურის მიერ დადგენილი/განსაზღვრული სამიზნე პოზიციები უნდა იყოს შემდეგი; 

• საქმიანობის ასპექტები და ადრესატი-სტრუქტურები: 

    -საგანმანათლებლო (საბაკალავრო, სამაგისტრო, ერთსაფეხურიანი განათლების, სადოქტორო) პროგრამები,

    -პროგრამების განმახორციელებელი და განხორციელების უზრუნველმყოფელი სტრუქტურები,

    -კვლევითი პროგრამები,

    -თბილისის სახელმწიფო სამედიცინო უნივერსიტეტის ეგიდით გამოცემული სასწავლო და სამეცნიერო პროდუქცია;

• დაგეგმილი სამუშაოს განხორციელება თსსუ-ის წესდების, შინაგანაწესის, ხარისხის უზრუნველყოფის სამსახურის დებულების შესაბამისად და შიდასამსახურებრივი (მათ შორის - აკადემიური საბჭოს მიერ დამტკიცებული) კრიტერიუმებით და გეგმით; 

• მიღებული შედეგების სარწმუნო ანალიზი და შიდასამსახურებრივი განხილვა, მათ შორის - ექსპერტთა აზრის გათვალისწინებით;

• ანალიზის შედეგად რეკომენდაციების/შენიშვნების/მოსაზრებების შემუშავება და წარდგენა სტრუქტურების, ფაკულტეტის და აკადემიური/ წარმომადგენლობითი საბჭოებისათვის. ამდენად, ხარისხის უზრუნველყოფის სამსახურმა უნივერსიტეტის ადმინისტრაციის, მმართველობის უმაღლეს კოლეგიურ ორგანოებს უნდა შესთავაზოს ობიექტურ მასალაზე დაყრდნობილი სარწმუნოდ გაანალიზებული ინფორმაცია და, უხშირესად, ასევე, რეკომენდაციები, რომლებიც საფუძვლად უნდა დაედოს მმართველობითი გადაწყვეტილებების მიღებას. თსსუ-ში ხარისხის უზრუნველყოფის სამსახურის მექანიზმებმა უნდა “მოიცვას” ხარისხის განვითარების ორი მოდელი:

•   არსებული ვითარების შეფასება (პირველ რიგში - ფაკულტეტის დონეზე),

• შეფასების საფუძველზე რეკომენდაციების შემუშავება და შეთავაზება მდგომარეობის გაუჯობესებისათვის ან შენარჩუნებისათვის.

ხარისხის უზრუნველყოფის სამსახურმა ქმედითად  უნდა ითანამშრომლოს უნივერსიტეტის პრაქტიკულად ყველა აკადემიურ, ადმინისტრაციულ, დამხმარე რგოლთან და, რაც განსაკუთერებით მნიშვნელოვანია, სტუდენტებთან. ხარისხის უზრუნველყოფის სამსახურის მიერ შემუშავებული კრიტერიუმები უნდა იყოს საჯარო და განთავსდეს თსსუ-ის ვებ-გვერდზე ხარისხის უზრუნველყოფის სამსახურის ნაწილში. ხარისხის უზრუნველყოფის სამსახურის მიერ ჩატარებული სხვადასხვა კვლევის შედეგები და შეფასებები უნდა  წარედგინოს  სამიზნე აუდიტორიას, კოლეგიური პასუხისმგებლობის ორგანოებს, შინაარსის და საჭიროების მიხედვით - განთავსდეს ვებ-გვერდზე.

 ამასთან, სასწავლო პროცესის შეფასება არ გულისხმობს პროცესის კონტროლს: მეცადინეობის ჩატარებისა და გაცდენის აღრიცხვა არ წარმოადგენს ხარისხის უზრუნველყოფის სამსახურის მოვალეობას, თუმცა, აკადემიური გარემოს შეფასების ასპექტში სასწავლო პროცესის მონიტორინგის ელემენტები ხარისხის უზრუნველყოფის სამსახურის ტაქტიკურ ამოცანებს ემთხვევა და ამდენად, ხარისხის უზრუნველყოფის სამსახური უნდა მონაწილეობდეს ამ სამუშაოშიც.

ხარისხის უზრუნველყოფის სამსახურის მიერ შეფასებითი და ანალიზური სამუშაოს რეკომენდებული  პერიოდულობა ასეთი უნდა იყოს:

    • საგანმანათლებლო პროგრამების - სასწავლო წელიწადში ერთხელ,

    • სტუდენტთა შეფასებისა - სემესტრში ერთხელ,

    • კვლევითი/სადოქტორო პროგრამებისა - საჭიროებისამებრ,

    • ბეჭდური სასწავლო და სამეცნიერო პროდუქციისა - საჭიროებისამებრ,

    • სტუდენტების აკადემიური მოსწრებისა - სემესტრში ერთხელ.

ხარისხის უზრუნველყოფის სამსახურის მიერ შეფასების პროცესში გამოყენებულია შიდა და გარე შეფასების ფორმები. ორივე შემთხვევაში უნდა გამოირიცხოს ინტერესთა კონფლიქტი. შემფასებლის შერჩევის ძირითადი კრიტერიუმი მისი დარგობრივი (ზოგჯერ - ზოგადი/ზოგადიც) კომპეტენციაა, კერძოდ:

    • რეპუტაცია და დარგობრივი კომპეტენცია,

    • საერთაშორისო გამოცდილება (სასურველია),

    • შეფასებითი მუშაობის გამოცდილება,

    • ერთობლივი პუბლიკაციების არარსებობა.

ხარისხის უზრუნველყოფის სამსახურმა უნდა მოამზადოს ანგარიშები უნივერსიტეტის გეგმიური თვითშეფასების, ავტორიზაციისა და  პროგრამების აკრედიტაციისათვის (სათანადო კრიტერიუმებისა და ინდიკატორების მიხედვით), მონაწილეობდეს სტუდენტთა მობილობის პროცესში, თანამშრომლობდეს ხარისხის განვითარების ეროვნულ ცენტრთან.

`შემფასებელი' თსსუ-ის სტუდენტიცაა, რომელიც საუნივერსიტეტო ერთობის აქტიური წევრია და მისი კომპეტენციის ფარგლებში მონაწილეობს სასწავლო პროცესში მისი ჩართულობის და მიღწეული შედეგების შეფასებაში/თვით-შეფასებაში. სტუდენტის მიერ სასურველი აკადემიური ხარისხის, ცონისა და უნარების, ანუ - კვალიფიკაციის მოპოვება მის მიერ საგანმანათლებლო პროგრამის (თუნდაც - იდეალურთან მიახლოებულის) მხოლოდ პასიური ათვისებით მისი ცოდნის ვალიდობას შეამცირებს და მისი თავისუფლების ხარისხსაც შეზღუდავს.

ეს ბოლო ასპექტი კურიკულუმის სწორად დაგეგმვას, მისი ეფექტური განხორციელების, შედეგების ობიექტური, გაზომვადი კრიტერიუმებით შესწავლის და შეფასების პროცესთა ჯაჭვის განვითარებას განსაზღვრავს.  ხარისხის უზრუნველყოფის სამსახური ამ ჯაჭვის ყველა რგოლში მონაწილეობს, თუმცა - სხვადასხვა აქტივობით. ასევე, განსხვავებულია კვლევების სავალდებულოდ ჩართულობის ფორმატი ამ უწყვეტი ჯაჭვის სხვადასხვა რგოლში.